பாலஸ்தீனக் குழுவிற்கும் இஸ்ரேலுக்கும் இடையே திட்டமிடப்பட்ட போர்நிறுத்தம் நடைமுறைப்படுத்தப்பட்டுள்ள போதும், வடக்கு காசாவில் உள்ள ஜபாலியா அகதிகள் முகாமில் உள்ள ஐக்கிய நாடுகள் சபையுடன் இணைந்த பாடசாலை மீது இஸ்ரேல் நடத்திய தாக்குதலில் சுமார் 30 பேர் கொல்லப்பட்டதாக ஹமாஸ் கூறியுள்ளது.
பாலஸ்தீன அகதிகளுக்கான ஐ.நா. நிவாரண மற்றும் வேலை முகமையால் நடத்தப்படும் அபு ஹூசைன் பாடசாலையின் மீது நடந்த தாக்குதலில் 27 பேர் கொல்லப்பட்டதாக காசா சுகாதார அமைச்சகம் அறிவித்தது.
இங்கு காசாவின் பிற பகுதிகளில் வன்முறை மற்றும் தீவிர குண்டுவெடிப்பில் இருந்து இடம்பெயர்ந்த பாலஸ்தீனியர்கள் தஞ்சமடைந்துள்ள பகுதியாகும்.
வடக்கு காசாவில் உள்ள இந்தோனேசிய மருத்துவமனையின் பிரதான நுழைவாயில் மற்றும் மின் உற்பத்தியாளர்களைக் குறிவைத்து இஸ்ரேலியப் படைகள் புதிய தாக்குதல்களை ஆரம்பித்துள்ளதாக அறிய முடிகின்றது.
200க்கும் மேற்பட்ட நோயாளிகள், மருத்துவ ஊழியர்கள் மற்றும் உள்நாட்டில் இடம்பெயர்ந்த மக்கள் தற்போது பீட் லஹியாவில் உள்ள மருத்துவமனையில் உள்ளதாக தெரிவிக்கப்பட்டுள்ளது.
இதற்கிடையில், இஸ்ரேலிய போர் விமானங்கள், தெற்கு காசா பகுதியில் உள்ள கான் யூனிஸில் ஷேக் நாசர் சுற்றுப்புறத்தைத் தாக்கின, இதில் குறைந்தது ஐந்து பேர் கொல்லப்பட்டனர் மற்றும் டசன் கணக்கானவர்கள் காயமடைந்தனர் என்று அதிகாரப்பூர்வ பாலஸ்தீனிய செய்தி நிறுவனமான வஃபா தெரிவித்துள்ளது.
வடக்கு காசாவில் ஷேக் ரத்வான் பகுதியில் உள்ள குடியிருப்பு வீடு மீது இஸ்ரேலியப் படைகள் நடத்திய தாக்குதலில் குறைந்தது 10 பேர் கொல்லப்பட்டதாகவும் அது தெரிவித்துள்ளது.
ஆக்கிரமிக்கப்பட்ட மேற்குக் கரையில், 12 வயதான முகமது இப்ராஹிம் ஃபுவாட் எடெலி இஸ்ரேலியப் படைகளால் சுட்டுக் கொல்லப்பட்டதாக பாலஸ்தீன அமைச்சகம் தெரிவித்துள்ளது. இந்த சம்பவம் ஒக்டோபர் 7 முதல் ஆக்கிரமிக்கப்பட்ட மேற்குக் கரையில் கொல்லப்பட்ட பாலஸ்தீனியர்களின் எண்ணிக்கையை 229 ஆகக் கொண்டு வந்தது, அவர்களில் 52 பேர் குழந்தைகள் ஆவர்.
பாலஸ்தீன அதிகாரிகளின் கூற்றுப்படி, இஸ்ரேலின் இடைவிடாத குண்டுவெடிப்புகளில் காசாவில் 14,800க்கும் அதிகமானோர் கொல்லப்பட்டுள்ளனர். இஸ்ரேலில், ஹமாஸின் தாக்குதல்களால் உத்தியோகபூர்வ இறப்பு எண்ணிக்கை சுமார் 1,200ஆக உள்ளது.
