சிறிய படகு மூலம் ஆங்கில கால்வாயை கடக்க முயன்ற, இரு புலம்பெயர்ந்தோர் உயிரிழந்துள்ளதாக அறிவிக்கப்பட்டுள்ளது.
நேற்று (புதன்கிழமை) பிற்பகல் பிரெஞ்சு கடற்கரையிலிருந்து ஒரு மைலுக்கும் குறைவான தூரத்தில் இந்த விபத்து சம்பவித்துள்ளது.
பிரான்ஸின் நியூஃப்சாடெல்-ஹார்டெலோட் நகரத்தை விட்டு வெளியேறிய இரண்டு மணி நேரத்தில், இருவரையும் ஏற்றிச் சென்ற படகு கவிழ்ந்ததில் இருவரும் நீரில் மூழ்கி உயிரிழந்துள்ளனர்.
இரண்டாவது சம்பவத்தில், 60 பேருடன், உள்ளூர் நேரப்படி 13:00 மணிக்குப் பிறகு, பிரெஞ்சு கடற்பகுதியில் படகு விபத்தில் சிக்கியிருந்தோர், அதிகாரிகளால் மீட்கப்பட்டுள்ளனர்.
இதில்; சுமார் 57 பேர் படகு மூலம் மீட்கப்பட்டதோடு, மற்றொருவர் விமானம் மூலமும் மீட்கப்பட்டு பிரான்ஸின் பவுலோன்-சுர்-மெர் நகருக்குக் கொண்டு செல்லப்பட்டனர்.
கிட்டத்தட்ட இரண்டு வருடங்களுக்கு பிறகு இந்த இறப்பு சம்பவங்கள் பதிவாகியுள்ளது. இரண்டு வருடங்களுக்கு முன்னதாக, ஒரு கர்ப்பிணிப் பெண் மற்றும் மூன்று குழந்தைகள் உட்பட குறைந்தபட்சம் 27 பேர் உயிரிழந்திருந்தமை குறிப்பிடத்தக்கது.
