ஏரிகள், காடுகள் , பள்ளத்தாக்குகள், பைன் வனம் போன்ற இடங்களுக்கு பெயர் பெற்ற ‘மலைகளின் இளவரசி’யான கொடைக்கானலில் இருந்து 35 கிமீ தொலைவில் உள்ள கூக்கால் கிராமத்தில் அமைந்துள்ள தூத்தூர் நீர்வீழ்ச்சி கூக்கால் நீர்வீழ்ச்சி என்றும் அழைக்கப்படுகிறது. சுற்றுலாப் பயணிகளுக்கு சொல்லப்படாத இடமாக உள்ளது. ஆனால் இன்று இதன் ரகசியங்களை உங்களுக்கு சொல்கிறோம்.
கோடை விடுமுறை வரும் இந்த சமயத்தில் கொடைக்கானலில் உள்ள மற்ற பிரபல சுற்றுலா தலங்களை கூட்டத்தோடு கூட்டமாக சென்று பார்க்காமல் இந்த தனிப்பட்ட இடத்தை உங்கள் பயண பட்டியலில் சேர்த்து என்ஜாய் பண்ணுங்க மக்களே. டிரெக்கிங், அருவியில் குளியல், அழகான வியூ பாயிண்ட் என்று எல்லாவற்றையும் அனுபவிக்கலாம்.
பழனி மலைகளால் சூழப்பட்டுள்ள கூக்கால் கொடைக்கானலில் இருந்து குதிரையால் மற்றும் கூக்கால் ரிசர்வ் பாரஸ்ட் செல்லும் வழியில் 30 கிலோமீட்டர் தொலைவில் உள்ளது. கொடைக்கானல் அளவு குளிர் இல்லாவிட்டாலும் மிதமான வானிலை தான் இங்கு காணப்படும். கொடைக்கானலில் இருந்து கூக்கால் கிராமத்திற்கு செல்லும் பயணம் மிகவும் அமைதியானது. சாலையின் இருபுறமும் அடர்ந்த பைன் மற்றும் யூகலிப்டஸ் மரங்கள் உங்களுக்கு நிழலை வழங்கும்.
சுமார் 1.30 மணிநேர பயணத்தில் நீங்கள் கூக்கார் கிராமத்தை அடைந்து விடலாம். கிராமத்திற்குள் நுழையும்போது, கூக்கால் ஏரி என்று அழைக்கப்படும் அழகிய ஏரி உங்களை வரவேற்கும். இங்கிருந்து ஒரு ட்ரெக்கிங் பயணம் செய்தால்தான் அருவியை அடைய முடியும். கூக்கால் நீர்வீழ்ச்சிக்கான மலையேற்றத்தை இரண்டு பிரிவுகளாகப் பிரிக்கலாம்.
ட்ரெக் தொடக்கப் புள்ளி முதல் வன நுழைவு வரை
வன நுழைவு முதல் கூக்கால் நீர்வீழ்ச்சி வரை
ட்ரெக் தொடக்கப் புள்ளி முதல் வன நுழைவு வரை
மலையேற்ற தூரம் – 2 கிமீ
மலையேற்ற காலம் – 1 மணி நேரம்
மலையேற்றம் கூக்கால் ஏரியிலிருந்து 1 கி.மீ. கூக்கால் ஏரியை அடையும் போது, அங்கே சிறிய உணவு வேன்களை பார்க்க முடியும். நீங்கள் அருவியை அடைய வழிகாட்டிகள் வேண்டும் என்று நினைத்தால் இங்கு உள்ள உள்ளூர் மக்களின் உதவியை பெறலாம். அல்லது தனிப்பட்ட வழிகாட்டிகளையும் கோரலாம். அவர்கள் உங்களை மலைப்பாதையில் அழைத்து செல்வார்கள்.
மலையில் இருந்து வளைந்து வளைந்து செல்லும் பாதை வழியாக சுமார் 500 மீட்டர் மலையில் கீழ் இறங்கினால், போல்டர் பாயின்ட் என்றழைக்கப்படும் காட்சியை அடைகிறீர்கள். இங்கிருந்து பார்க்கும் காட்சி அருவியின் தூரத்து காட்சி, பசுமையான காடுகள், இடையிடையே கிராமங்களின் காட்சி பார்ப்பதற்கு அழகாக இருக்கிறது. இங்கிருந்து செங்குத்தாக செல்லும் பாதையில் சுமார் 1.5 கிமீ தூரம் இந்தப் பாதை வழியாகப் பயணித்து வன நுழைவாயிலை அடையலாம்.
கூக்கால் நீர்வீழ்ச்சி முதல் வன நுழைவு வரை :
மலையேற்ற தூரம்: 1 கிமீ
மலையேற்ற காலம்: 30 நிமிடங்கள்
இதுவே இந்த மலையேற்றத்தின் இறுதிப் பயணமாகும். அடர்ந்த காடு மற்றும் புதர்கள் வழியாக செல்லும் ஒத்தையடி பாதையில் உங்களை அழைத்துச் செல்கிறது. இந்த பாதையின் சிறப்பு அம்சம் என்னவென்றால், நீர்வீழ்ச்சி கண்ணுக்குத் தெரியவில்லை என்றாலும், பாதை முழுவதும் நீரின் ஓட்டத்தை நீங்கள் கேட்கலாம்.
பயணத்தின் முடிவில் ஒரு குளம் தென்படும். அதன் அருகே தான் அருவி அமைந்துள்ளது. 300 அடி உயர பாறைகளில் இருந்து விழும் குளிர்ந்த நீர் உங்கள் பயண சோர்வுகளை எல்லாம் மறக்க செய்துவிடும். அது மட்டும் இல்லாமல் இங்கு யானைகள் சில உலவும். உங்களுக்கு அதிஷ்டம் இருந்தால் இங்கு யானைகள் குளிக்கும் அழகிய காட்சிகளை காணலாம்.
மாலை சூரியன் இறங்குவதற்குள் காட்டை விட்டு வெளியேறி மலை ஏற ஆரம்பிப்பது நல்லது. இறங்கி வந்த நேரத்தை விட மலை ஏறுவது நேரம் கூடுதலாகும். ஆனால் மொத்த பயணமும் நல்ல திருப்தியை அளிக்கும். இந்த கோடைக்கு நிச்சயம் கூக்கால் கிராமத்திற்கும், தூத்தூர் அருவிக்கும் குடும்பம், நண்பர்களோடு சென்று வாருங்கள் .
