இந்திய பங்குச் சந்தைகளில் இன்று பங்கு வர்த்தகம் சரிவை சந்தித்தது. சென்செக்ஸ் 571 புள்ளிகள் வீழ்ச்சி கண்டது.
ரஷ்யாவிலிருந்து கச்சா எண்ணெய் இறக்குமதி செய்ய தடை விதிக்க ஐரோப்பா ஆலோசனை செய்து வருவதாக தகவல் வெளியானது. முதலீட்டாளர்கள் லாப நோக்கில் பங்குகளை விற்பனை செய்தது போன்ற காரணங்களால் இன்று பங்கு வர்த்தகம் சரிவை சந்தித்து. சென்செக்ஸ் கணக்கிட உதவும் 30 நிறுவன பங்குகளில், சன்பார்மா மற்றும் எச்.டி.எப்.சி. வங்கி உள்பட மொத்தம் 5 நிறுவன பங்குகளின் விலை உயர்ந்தது. அதேவேளையில், பவர்கிரிட் மற்றும் ஏசியன் பெயிண்ட்ஸ் உள்பட மொத்தம் 25 நிறுவன பங்குகளின் விலை குறைந்தது.
மும்பை பங்குச் சந்தையில் இன்று 1,561 நிறுவன பங்குகளின் விலை உயர்ந்தது. 1,965 நிறுவன பங்குகளின் விலை குறைந்தது. 144 நிறுவன பங்குகளின் விலையில் எந்தவித மாற்றமும் இன்றி முடிவடைந்தது. மும்பை பங்குச் சந்தையில் பட்டியலிடப்பட்டுள்ள நிறுவனங்களின் பங்குகளின் மொத்த சந்தை மதிப்பு ரூ.258.38 லட்சம் கோடியாக குறைந்தது. ஆக, இன்று முதலீட்டாளர்களுக்கு ஒட்டு மொத்த அளவில் ரூ.2.01 லட்சம் கோடி நஷ்டம் ஏற்பட்டது.
இன்றைய பங்கு வர்த்தகத்தின் முடிவில், மும்பை பங்குச் சந்தையின் குறியீட்டு எண் சென்செக்ஸ் 571.44 புள்ளிகள் குறைந்து 57,292.49 புள்ளிகளில் நிலை கொண்டது. தேசிய பங்குச் சந்தையின் குறியீட்டு எண் நிப்டி 169.45 புள்ளிகள் சரிவு கண்டு 17,117.60 புள்ளிகளில் முடிவுற்றது.
