ஜல்லிக்கட்டு போட்டி கண்டிப்பாக நடைபெறும் என்று தமிழக வணிகவரி மற்றும் பதிவுத்துறை அமைச்சர் மூர்த்தி தெரிவித்துள்ளார்.
தமிழர்களின் பாரம்பரிய விளையாட்டாகவும், நம் மக்களின் வீரத்தை பறைசாற்றும் வகையிலும் ஜல்லிக்கட்டு போட்டிகள் அமைந்துள்ளன. ஆண்டுதோறும் பொங்கல் பண்டிகையையொட்டி, தமிழகத்தின் பல்வேறு மாவட்டங்களில் ஜல்லிக்கட்டு போட்டிகள் நடத்தப்படுகிறது.
குறிப்பாக, மதுரை மாவட்டம் அலங்காநல்லூர், பாலமேடு, அவனியாபுரம் ஊர்களில் நடத்தப்படும் ஜல்லிக்கட்டு உலகப் புகழ்பெற்றவை. முன்னதாக, ஜல்லிக்கட்டு போட்டிக்கு தடை விதிக்கப்பட்ட நிலையில், அறவழிப் போராட்டத்தின் வாயிலாக தமிழக மக்கள் அதனை மீட்டெடுத்தனர்.
இதனிடையே, கொரோனா, ஒமைக்ரான் பரவல் காரணமாக நடப்பாண்டுக்கான ஜல்லிக்கட்டு போட்டிகள் நடைபெறுமா என்ற கேள்வி பொதுமக்களிடம் எழுந்தது. கொடிய வைரஸ் தொற்றுடன் நாடே போராடி வரும் சூழ்நிலையில் ஜல்லிக்கட்டு போன்ற அத்தியாவசியமற்ற போட்டிகளுக்கு இடம் அளிக்க கூடாது. எனவே மருத்துவர்களின் தொழில்முறை கருத்துகளுக்கு செவிசாய்த்து, பொதுமக்களை ஆபத்தான நோயில் இருந்து காக்கவும், காளைகளை கொடுமைகளில் இருந்து காக்கவும் ஜல்லிக்கட்டு போட்டியை கைவிடவேண்டும் என்று பீட்டா அமைப்பு தமிழக அரசுக்கு கடிதம் எழுந்தியிருந்தது.
இந்த நிலையில், ஜல்லிக்கட்டு போட்டி கண்டிப்பாக நடைபெறும் என்று தமிழக வணிகவரி மற்றும் பதிவுத்துறை அமைச்சர் மூர்த்தி தெரிவித்துள்ளார். இதுகுறித்து மதுரையில் செய்தியாளர்களை சந்தித்த அவர், ஜல்லிக்கட்டுப் போட்டிகளை நடத்துவது குறித்து ஆணை பிறப்பிக்கப்பட்டுள்ளது. அதனை எப்படி நடைமுறைப்படுத்துவது என்பது குறித்து முதல்வர் இன்று அறிவிப்பார் என்று எதிர்பார்க்கப்படுகிறது.
முதல்வரின் அறிவிப்பு வெளியான உடனே, கொரோனா நோய்த் தொற்று பரவி விடாமல் ஜல்லிக்கட்டுப் போட்டிகளை நடத்தும் வகையிலும் விதிமுறைகள் வெளியாகும். அதன் அடிப்படையில் போட்டிகள் நடத்தப்படும்.” என்றார்.
