பாவை நோன்பின் இறுதிப் பகுதியை அடைந்ததையும், கண்ணனின் அருளை பெற்றதையும் மகிழ்ச்சியாக ஆண்டாள் தனது திருப்பாவை பாடலின் 27வது பாசுரத்தில் விளக்கி உள்ளார். மார்கழியின் 26 நாட்களும் கண்ணனிடம், எங்கள் மீது கருணை கொண்டு உன்னுடைய அருளை கொடு என கேட்டு பாடினார். கண்ணனின் அருளை தான் மட்டும் பெற்றால் போதாது என்று தனது தோழிகள், அக்கம் – பக்கத்தினர், கண்ணன் வீட்டில் இருப்போர் என அனைவரையும் அழைத்துக் கொண்டு சென்று பெற்றார்.
கண்ணனின் அருளை பெற்ற மகிழ்ச்சியில் பாவை நோன்பினை எவ்வாறு நிறைவு செய்ய போகிறார் என்பதனை 27 வது பாசுரத்தில் குறிப்பிட்டுள்ளார் ஆண்டாள். பாவை நோன்பு இருக்கும் சமயத்தில் எங்களை நாங்கள் அழகுபடுத்திக் கொள்ள மாட்டோம். கண்களுக்கு மையிட்டுக் கொள்ள மாட்டோம். அழகான ஆடை உடுத்தி எங்களை அழகுபடுத்திக் கொள்வதில் கவனம் செலுத்தாமல், உன்னை அடைவதையே நோக்கமாகக் கொண்டு தவம் போல் இந்த விரதத்தை நாங்கள் இருக்க போகிறோம் என முந்தைய பாசுரங்களில் குறிப்பிட்ட ஆண்டாள், இப்போது விரதத்தை நிறைவு செய்வதால் தங்களை எப்படி அழகு செய்து கொள்ள போகிறோம், இன்னும் என்னவெல்லாம் செய்ய போகிறோம் என்பதை குறிப்பிடுகிறார்.
மார்கழியின் 27 வது நாள் பாசுரத்தில் பாவை நோன்பினை ஆண்டாள் நிறைவு செய்ய உள்ள மகிழ்ச்சியை கூடாரவல்லியாக கொண்டாடுவார்கள். இந்த நாளில் ஆண்டாள் தனது பாசுரத்தில் குறிப்பிட்டது போன்று அக்காரஅடிசல் நைவேத்தியமாக பெருமாளுக்கு படைத்து வழிபட வேண்டும்.
திருப்பாவை பாசுரம் 27 :
கூடாரை வெல்லும்சீர்க் கோவிந்தா ! உன்றன்னைப்
பாடிப் பறைகொண்டு யாம்பெறு சம்மானம்
நாடு புகழும் பரிசினால் நன்றாகச்
சூடகமே தோள்வளையே தோடே செவிப்பூவே
பாடகமே என்றனைய பல்கலனும் யாமணிவோம்
ஆடை உடுப்போம் அதன்பின்னே பாற்சோறு
மூடநெய் பெய்து முழங்கை வழிவார
கூடி யிருந்து குளிர்ந்தேலோ ரெம்பாவாய்
பொருள் :
எதிரிகள் எத்தனை வல்லவராக இருந்தாலும் அவர்களை அழித்து, எதிர்ப்பதற்கு யாருமே இல்லை என வெற்றிகள் அனைத்தையும் தன் வசமாக வைத்துள்ள வல்லமை கொண்ட கோவிந்தனே! உன்னை போற்றி புகழ்ந்து, உன்னுடைய கருணையை நாங்கள் பெற்ற பிறகு அதை விட மேலான பரிசு எதுவும் எங்களுக்கு இனி வேண்டாம். பாடை நோன்பினை நிறைவு செய்த பிறகு தலைக்கு சூடகம், கழுத்திற்கு நகைகள், வளையல்கள், காதிற்கு தோடு, இடுப்பிற்கு உரிய அணிகலன் என அனைத்தையும் அணிய போகின்றோம்.
நன்கு அழகான, கண்களை கவரும் உடைகளை உடுத்திக் கொள்ள போகிறோம். அதற்கு பிறகு, தண்ணீரில் அல்லாது பாலில் சோற்றினை வேக வைத்து, அதோடு வெல்லம் சேர்த்து தித்திப்பான உணவை தயார் செய்ய போகிறோம். அந்த உணவினை ஒருவருக்கு கைகளில் வழங்கினால், அந்த உணவில் சேர்க்கப்பட்ட நெய், வாங்குபவரின் கை வழியாக வழிந்து, முழங்கை வரை வழிந்தோடும். அந்த அளவிற்கு நெய் ஊற்றி சுவையான உணவினை தயார் செய்து, அனைவரும் கூடி உண்டு மகிழ போகிறோம்.
விளக்கம் :
மார்கழி மாதத்தில் கடைபிடித்து வந்த பாவை நோன்பினை நிறைவு செய்ய போவதன் மகிழ்ச்சியை ஆண்டாள் இந்த பாடலில் வெளிக்காட்டி உள்ளார். இறைவனின் அருளை பெற்ற பிறகு வேறு என்ன இந்த உலகில் வேண்டும். இறைவனின் அருளை தவிர தங்களுக்கு எதுவும் பெரிதல்ல எனக் கூறும் ஆண்டாள், பெண்களுக்கே உரிய இயற்கை குணத்தை வெளிப்படுத்தும் வகையில் தங்களை எப்படி எல்லாம் பெண்கள் அலங்கரித்துக் கொள்ள ஆசைப்படுவார்கள் என்பதை இங்கு விளக்குகிறார். நிறைவாக மார்கழி மாதத்தின் நிறைவாக பால், அரிசி, பருப்பு, வெல்லம் சேர்த்து படைத்து, அனைவரும் ஒன்றாக சேர்ந்து பகிர்ந்து உண்ணும் பொங்கல் பண்டிகை கொண்டாடப்படுவதையும் ஆண்டாள் இந்த பாடிலில் குறிப்பிட்டுள்ளார்.
