வைதேகி காத்திருந்தாள் சீரியலில் முன்னா நடிக்க ஆரம்பித்து ஒரு வாரமே ஆன நிலையில் தற்போது அந்த சீரியல் நிறுத்தப்பட்டிருக்கிறது.
விஜய் டிவி-யின் பிரபல சீரியல் தொடங்கிய வேகத்திலேயே நிறுத்தப்பட்டுள்ளது.
விஜய் டிவி-யில் ஒளிப்பரப்பாகும் சீரியல்கள், ரியாலிட்டி ஷோக்கள் ரசிகர்களை பெரிதும் கவர்ந்து, மக்களின் மனதில் நிரந்தரமாக நிற்கும். சீரியல்களைப் பொறுத்தவரை ரசிகர்களை ஈர்க்கும் வகையில் வித்தியாச கதைகளத்துடன் பல சீரியல்கள் ஒளிபரப்பாகி வருகின்றன. வரவேற்பைப் பெறாத சீரியல்களின் ஒளிபரப்பை நிறுத்தவும் சேனல் நிர்வாகம் தயங்கியதில்லை.
இந்நிலையில் சமீபத்தில் விஜய் டிவி-யில் ‘வைதேகி காத்திருந்தாள்’ என்ற சீரியல் தனது ஒளிபரப்பை தொடங்கியது. இதில் பிரஜின் கதாநாயகனாகவும், சரண்யா கதாநாயகியாகவும் நடித்தனர். ஆனால் கடந்த வாரம் அந்த சீரியலில் இருந்து திடீரென விலகினார் பிரஜின்.
சினிமா படப்பிடிப்பில் பிஸியாக இருப்பதால் சீரியலுக்கு தேதிகள் ஒதுக்குவதில் சிக்கல் ஏற்பட்டுள்ளதாக தெரிவித்தார். முன்பே கமிட்டான படங்கள் என்றாலும் சீரியலையும், சினிமாவையும் பேலன்ஸ் செய்யலாம் என்ற நம்பிக்கையில் சீரியலில் நடிக்க ஓகே சொன்னதாகவும், ஆனால் நாளடைவில் சிரமத்துக்கு ஆளானதாகவும் குறிப்பிட்டுள்ளார். ஆகையால் சேனல் நிர்வாகத்துடன் சுமூகமாக பேசி, தொடரிலிருந்து வெளியேறியதாகவும் குறிப்பிட்டார்.
இதையடுத்து வைதேகி காத்திருந்தாள் தொடரில் பிரஜினுக்கு பதிலாக முன்னா ஒப்பந்தமானார். அவர் ஏற்கனவே விஜய் டிவி-யின் ராஜபார்வை சீரியலில் நடித்திருந்தார். வைதேகி காத்திருந்தாள் சீரியலில் முன்னா நடிக்க ஆரம்பித்து ஒரு வாரமே ஆன நிலையில் தற்போது அந்த சீரியல் நிறுத்தப்பட்டிருக்கிறது. மிகக் குறைந்தளவு டி.ஆர்.பி ரேட்டிங் காரணமாக இந்த சீரியல் நிறுத்தப்பட்டுள்ளதாக தகவல்கள் தெரிவிக்கின்றன. தொடங்கிய வேகத்திலேயே வைதேகி காத்திருந்தாள் சீரியல் நிறுத்தப்பட்டிருப்பது விஜய் டிவி ரசிகர்களுக்கு சோகத்தை ஏற்படுத்தியுள்ளது.
