இனி இந்த சுந்தரி ஆடுற ஆட்டத்தை எல்லோரும் பார்க்கப் போகிறீங்க என்று சுந்தரி பேசியதைப் பார்த்த கார்த்திக் அப்படியே ஆடிப்போயிருக்கிறான்.
கிராமத்து பெண் என்றால் இழுத்த இழுப்புக்கு எல்லாம் வருவாள் என்று நினைத்த கார்த்திக் மண்டையில் இடியை இறக்கியிருக்கிறாள் சுந்தரி. ஏய் வெளியே போடா என்று வீட்டை விட்டு துரத்தி விட்டிருக்கிறாள்.
சுந்தரியை திருமணம் செய்த பின்னர் அனுவையும் காதலித்து திருமணம் செய்து கொண்ட கார்த்திக் இப்போது இடியாப்ப சிக்கலில் இருக்கிறான். இதுநாள் வரை யாருக்கு எந்த உண்மை தெரியக்கூடாது என்று ரகசியமாக அனுவுடன் குடும்பம் நடத்தினானோ அந்த உண்மை சுந்தரிக்கு தெரிந்து விட்டது.
அதிர்ச்சியின் உச்சத்தில் இருந்த சுந்தரியிடம் போய் பேசக்கூடாத வார்த்தைகளை எல்லாம் பேசி அவளின் கோபத்தை சீண்டி விட்டு விட்டான் கார்த்திக். அதுவே அவனுக்கு சிக்கலாகிப் போய் விட்டது. அனு கர்ப்பமாக இருக்கும் செய்தி சந்தோஷத்தை கொடுத்தாலும் சுந்தரிக்கு தன்னைப்பற்றிய உண்மை தெரிந்து விட்டதே என்று கொஞ்சம் உள்ளுக்குள் பயத்தோடுதான் இருக்கிறான்.
அனுவிடம் பேசிக்கொண்டிருந்த நேரம் பார்த்து போன் செய்கிறான் கார்த்திக்கின் நண்பன். சுந்தரிக்கு உடம்பு சரியில்லையாம் என்ன பிரச்சினை என்று கேட்கிறான். நான் பார்த்துக்கொள்கிறேன் என்று அவனிடம் போனில் சொல்லி விட்டு உடனே சுந்தரியைப் பார்க்க அவளது வீட்டிற்கு போகிறான்.
சுந்தரியோ வெட்டிப்போட்ட கீரைத்தண்டு போல வாடிப்போய் படுத்திருக்கிறாள். அவளது கண்களில் இருந்து கண்ணீர் நிற்காமல் வழிந்து கொண்டிருக்கிறது. அதைப்பார்த்து கார்த்திக்,சுந்தரியிடம் மன்னிப்பு கேட்கிறான். நீ அழவதை என்னால் பார்க்க முடியவில்லை என்று சொல்கிறான்.
உன்னைக்காயப்படுத்த நான் பேசவில்லை… என்னோட வாழ்க்கையை கெடுத்து விட்டார்களே என்ற கோபம்தான். எனக்கு இருக்கும் அழகு, புத்திசாலித்தனத்திற்கு சொடக்கு போடும் நேரத்தில் பெண்கள் அப்படியே சொக்கி விழுவார்கள். ஆனால் நான் யாரையும் தப்பா பார்த்ததில்லை என்று சொல்கிறான் கார்த்திக். அனுவை மட்டுமே நான் காதலித்தேன் அதனால்தான் அவளை கல்யாணம் செய்து கொண்டேன் என்று சொல்கிறான்.
நான் உன்னை விட்டு விட மாட்டேன் என்று சொன்ன கார்த்திக் அனுவுக்கு தெரியாமல் இப்படியே இருக்கலாம் என்று சொன்னதோடு உன்னைக்காப்பாத்துவது எனக்கு பெரிய விசயமில்லை என்று சொல்லிவிட்டு அப்படியே அவளை தொடுகிறான்.
அப்போது ஆங்காரத்தின் உச்சத்திற்கே செல்கிறாள் சுந்தரி. கையை எடு என்று சொல்லி அவன் கொடுத்த காபியை தட்டி விடுகிறாள். அவனை அடிக்கிறாள். உனக்கும் எனக்கும் பொருத்தம் இல்லைன்னு சொன்னவன்தானே நீ… ஆசைக்கு ஒருத்தி அடுப்பாங்கரைக்கு இன்னொருத்தி என்று சொல்லி இரட்டை வாழ்க்கை வாழ்ந்தவன்தானே நீ என்று கார்த்திக்கை பார்த்து குமுறுகிறாள் சுந்தரி.
நாய் நரி கூட குழந்தைப் பெத்துக்கும் அது இல்லை ஆம்பளைத்தனம். நம்புனவங்களுக்கு உசுரைக் கொடுக்கணும் அதான் ஆம்பளைத்தனம். அவன்தான் அழகன்…அப்படிப்பார்த்த நான் பேரழகிடா என்று சொல்கிறாள் சுந்தரி. அவளது ஒவ்வொரு வார்த்தையும் கார்த்திக்கை சுடுகிறது. அனுவிடம் சொல்லவா என்றும் மிரட்டுகிறாள். அதோடு நான் நல்லா படிச்சு கலெக்டராகி உன் முன்னாடி உசத்தியா வாழ்ந்து காட்டல நான் சுந்தரியில்லை என்று சவால் விட்டதோடு ஏய் வெளியே போடா என்று வீட்டை விட்டு துரத்தி விடுகிறாள். கார்த்திகிடம் விட்ட சவாலில் சுந்தரி ஜெயிப்பாளா? அனுவிற்கு உண்மை தெரிந்தால் கார்த்திக்கின் வாழ்க்கை என்னவாகும்… நேயர்களின் பல கேள்விகளுக்கு இனிவரும் எபிசோடுகளில் விடை தெரியும்.
